Bowle Waggis (Gegründet 1998)

Bowle Waggis - Logo
Bowle-Waggis
Fasnacht 2006
Fasnacht 2006   -    Bilder Umzug

   PISA-Studiä – oder Ziri ze Ditschland iberwyyse!


   Es isch kuum zem Glaube und e jede wais es
   Progräm for Internätionel Stiudent Assessment, haisst es
   E Projäggt mit Tescht’s fir d’Nindglässler sell’s zaige
   d’Entwigglig fir d’Zuekunft vo dr Schwyz maint me
   S’Bundesamt fir Statistik het Zaahle und Zaahle zämme biige
   und denn alles in e grossi Dokumentation fir uns gschriibe
   D’Ergäbnis vo dr Studie hänn sii im 2005 zaigt
   Intelligänz het’s in dr Schwyz wyt und brait
   Mathematik, ghert zue unsere Stärgge und das isch wohr
   ains und ains git zwai und das nid erscht siit em letschte Johr
   Luegsch uff Bärn wie dr Bundesrot Merz dert rächne duet
   verstoh duets kaine, s’Resultat stimmt und das isch guet
   S’Zyri isch das ganz anderscht, die hänns no nie glehrt
   verkaufe d’Swiss nach Ditschland sisch nid verkehrt
   s’blybt unterem Strich nid me ibrig, usser d’Schulde
   und die blyybe jo bim Volg in Bäärn, in dr grosse Mulde
   D’Studie zaigt au mir hänn Problem, je jo dernoo
   im Kapitel Läsekompetänz duets massiv happere s’isch halt esoo
      – Finde vo Informationä immene aifache Teggscht
      – mit em aigene Wisse z’kombiniere do verreggsch
      – und denn au noh e richtige Schluss druss zieh
   dass will bim beschte Wille aifach nid glabbe, bi aller Mieh
   D’Schuele und Lehrer sind nadyrlig massiv unter Drugg
   s’Parlamänt und Beherde wyyse wie immer alles zrugg
   E neye Wyyrus, näbschd Vogelgrippe, macht jetzt allne z’schaffe
   kaine draut meh, us pynliger Angscht im andere ind Auge gaffe
   Und jetzt zaigt Studie noh e Gebiet do simmer Maischder
   s’Problemleese, e Sterggi, es schaide sich zwar Gaischter
   schnell dängge, nid informiere, sofort handle und agiere
   Zyri zue Ditschland, kai Fluglärm, kai lamentiere
   denn Ziri sänggt mit em heggschte Uuswärtigsresultat
   s’Immig vo der Schwyz, das gränzt an Hochverat
   In dere Pisa Studie muess e wirgligg grosse Fähler syy
   Ziri, die gschydschte Schwyzer, denn ischs mit uns bald verbyy
   Drum zaichne mir d’Schwyzerkarte ganz schnäll nei
   ohni Ziri goohts uns besser, denn sinn mir frei
   Und jetzt als intelligänte Burger die räschdlige Kanteen richtig blatziere
   und bi uns Bowle-Waggis e guets Schliggli verdeguschdiere
   Scheeni Fasnacht ..
Fenster schliessen